Jürgen Koppelin Reden

Rede Minderheitenansprache Juni 2004

Rede Jürgen Koppelin, MdB

Donnerstag, 17. Juni 2004
Deutscher Bundestag

Zweiter Bericht der Bundesrepublik Deutschland gemäß Art. 15 Abs. 1 der Europäischen Charta der Regional- oder Minderheitensprachen

Dat kömmt nich oft för, dat en wi ik von de Opposition wat von de Regierung loben deit, aver de Unnerichtung von de Regierung över de Minderheitenspraken is en gode Bericht, wat dor op en Dutt sammelt worn is.
Wat besonners god is, dat wi ok mal erforen dot, wat dat so all an Aktivitäten in de Länders un in Organisationen geven deit, damit uns nederdüütsche Sprok wedder mer snakt ward.
Und dat is god, denn wi het Klaus Groth ar schreben: Min Modersprok wie klingst du schön, wi bis Du mi vertrut.
Un dor möt wi wedder hin , dat uns plattdüütsche Modersprok nich nur von Oma un Opa, sönnern ok uns jung Lüt wedder vertrut ward.
Wi beklogt in disse tid oft dat agressive in de Sprok von de Jugend von hüt.
Wen de platt snaken wörn, denn is dor keen Agressivität mer in de Sprok.
Dor kans denn ruhig ok mal seng „Mensch, klei mi an de Mors“, wenn Du di över en annern argern deist , un de anner Minsch kann denn gern mal seng: „ Dat kans Du mi ok“. Aver doröber gift dat kein ant Muu
In 8 Bunnesländer könnt Minschen platt snaken. Wenn dat so is, denn is dat god und dat mut plegt warn.
Bi disse Gelegenheit mut ik ok mal noch wat los warn: De hüttige Debatte in uns Parlament is kein Utsprak över „Mundartsprachen“, wie uns Öllersrat meent, sondern hier geit dat um de Pleg und Förderung von Minnerheitenspraken. Dat is aver wat anners als „Mundartsprachen“.
Ik will hüt nich kreteseren in disse Utsprak, sonnern ik denk, wi schullen hier mal laben: Tun Bispeel de Vereine in uns Gemeinden, wo manch Vorstand, wo manch Versammlung op platt avholn ward.
In so manches Dorp ward platt in de Gemeindeversammlung snakt un den groten Bebuungsplan kannst Du ok op platt better begrippen. Aver wär dat nich schön, wenn ok de Architekt von de Bebuungsplan platt snaken kun? Un so de Vertetung dat alns veel beter verklikkern kun.
Also, wenn Du bi uns in de Dörper en Geschäft mit de Gemeindevertretung moken wüllst, denn bist Du gut beroten, wenn Du vörher mal en beten platt lörnen deist.
Un wat is dat schön, wenn uns Paster mal wedder sin Goddesdenst op platt holen deid. Lüüt, dat glövst Du nich, wenn Du dat ni sülben miterlevt hest. Denn is die Kark mal wedder richtig vull. Un wi hept nu ok in de meisten Karken en plattdüütsches Gesangbook un de Wachholz-Verlag ut Niemünster hät nu in Dezember von dat letzte Johr ok dat „Nee Testament“ in plattdüütsch rutbroch.
Dorvör will ik mi hier in disse Debatte mal bedanken.
Ik glöv, wi könnt tosamen noch veel för uns plattdüütsche Sprok moken. So wünsch ik mi, mer plattdüütsch in de Klönkassen un in Televischen, denn de öffentlich-rechtlichen hebt ok mit dat Betolen von de Gebühren en Kulturobdrach.
Ik men, en Erhöhung von Gebühren, wie ARD und ZDF sik dat vörstellt för de nächste tied kann ok nur akzeptiert warn, wenn de Obdrach erfüllt ward ok uns Minnerheitensproken mer to gehör to bringn.
Dringend kümmern möt wi uns um dat Friesisch. Dor möt wi noch veel meer moken. Ok wen ton Bispeel de Friesenrat all manich veel mogt het. Ik will me bi dessen Gelegenheit be den Friesenrat dank seng för sin Aktivitäten.
Ik will aver klor seng un dütlich moken, mit Geld oder mit Anwisungen is dat nich don. Ok int Ollernhuus mut wer uns Plattdüütsch oder Friesisch snakt war. Wi, de wie disse Spraken snaken könnt, hebt de Obgav, disse wunnerbaren Spraken an uns Kinner wiedertogeven.
Un deshalb seg ik tun Schluss von min Bidrag:
En Lun sönner Spreek es en Lun sönner Seel.
Dat is Helgoländer Friesisch.
Wenn Du dat nich verston hest, denn will ik Di dat gern oversetten:
En Land ohne Sprak is en Land ohne Seel.
Ein Land ohne Sprache ist ein Land ohne Seele.
Weest all bedankt vör jüm Opmerksamket.